Сайт храма Вознесения Господня села Старая Степановка

Покаянная молитва ко Пресвятой Богородице, чтомая 25 июля. Во грехе детоубийства кающегося.

О Пресвятая Мати Господа нашего Иисуса Христа, Небесе и земли Царице!

  К Тебе ныне прибегаем, Госпоже наша, просяще милости Твоея. Да не отвратиши Лика Пречистаго, да не прогневаешися до конца на рабы непотребныя! Несть числа беззаконий наших, несть числа, Госпоже Богородице, грехов тяжких, вопиющих к Небу об отмщении.

  Кровь убиенных чад наших свидетельствует на ны; вопль велик и страшен возносится от земли Российския к Пречистому и Непорочному Агнцу Божию! Уподобишася народ наш древним язычником, пожроша бо младенцы своя новому Ваалу; пролияша кровь их яко воду окрест святых алтарей Господних. Вси согрешихом, Мати Божия, вси повинни есмы. Аще бо и не убиша чад наших, обаче же духом не возмутишася, не воздвигоша гласа своего, не возопиша в защищение невинных младенцев. Инии же от нас убиваша без жалости чад во утробе своей, обагриша руце своя кровию неповинною.

  Страшно есть впасти в руце Бога Живаго! Страшно есть услышати глас Агнца: Отойдите от Мене, проклятии! Понеже сотвористе единому сих братий Моих меньших - Мне сотвористе! Милосердная Мати Бога нашего, умилосердися, умоли Владыку Христа, да приимет сей вопль наш, да подаст время на покаяние! Да дарует крепость и разум начальствующим в народе нашем, яко да обратят меч свой, Богом данный, противу беззаконий лютых. Народ наш да обратит на покаяние, добрую волю возвратит падшим, пастырям да подаст крепость духовную, Православную веру возвысит, ереси и расколы да упразднит в земле нашей и утвердит Церковь Русскую до скончания века незыблему!

    Паки коленопреклоненно, со слезами припадаем Ти, Госпоже, молящеся о убиенных чадах наших! Сопричти их лику мучеников - младенцев, в Вифлееме от Ирода пострадавших. Омышася бо кровию, егда убиваемы быша родители своими, одержимыми духом злобы, против Христа восстающе, якоже и оный беззаконный. Не лиши, Благодатная, утешения страдальцев сих, буди им, матерней любви не познавшим, милосердная Мати. Оттри слезы от очей их, чающих Христова утешения. Мати Божия, скоро услышавшая Преподобнаго Иоанна Дамаскина, и здравие ему подавшая, услыши и нас, кающихся в грехе тяжком! Даруй очищение душам нашим, укрепи руци ослабевшия от уныния. Каемся, плачем и болезнуем пред пречистым ликом Твоим предстояще. Буди Ходатаица! Умоли со святыми младенцами-мучениками, с Преподобным Иоанном и со святыми Новомученики и Исповедники Российскими, да прославится в милости к нам, окаянным и падшим, во Святей Троице славимый Бог наш: Отец, Сын и Святый Дух, во веки веков. Аминь